.....من يتحمل مسؤولية البناء المخالف ؟.....
.......... المواطن أم المحليات الفاسدة؟.......
.....بيوت المصريين ليست لعبة في يد الجرافات ....
.........اقتراحات مقدمة مني لمجلس النواب.........
بقلم النائب: عبده أحمد حسانين
المشهد الذي يتكرر في كل محافظة جرافة تقف أمام بيت سقف خرساني حوائط متمحرة عداد كهرباء ومياه راكب رسمي جوة البيت عفش اتقسم بالقسط عروسة لسه متجوزة من 6 شهور راجل عنده 60 سنة عاش عمره كله عشان يبني أوضة فوق لأبنه
بره البيت أم بتصوت عيال حافية وموظف بيقرا قرار إزالة وهو بيبص في الأرض
السؤال اللي بيسأله كل مصري دلوقتي
إزاي بيت متكلف 400 ألف جنيه وساكن فيه 3 أسر يتقرر هدمه في 10 دقايق؟
مين الغلطان؟ المواطن اللي اتزنق ولا الموظف اللي قبض
من المتحمل المسؤولية الحقيقية؟
لازم نسمي الأشياء بأسمائها عشان منظلمش حد ومنظلمش الدولة
المواطن غلطان؟ أيوه.. لكن غلطان غصب عنه
الراجل اللي بنى على أرض زراعية أو من غير رخصة خالف القانون دي حقيقة
لكن ليه خالف؟
لأنه مش لاقي شقة بـ 500 ألف جنيه في الإسكان الاجتماعي
لأنه مستني اسمه ينزل في القرعة من 7 سنين
لأنه لقى موظف في الوحدة المحلية بيقوله ابني وأنا هعديها لك.. ودفع 20 ألف جنيه إكرامية
فالمواطن هنا متهم ومجني عليه في نفس الوقت اتزنق بين سندان الأسعار ومطرقة الفساد
الموظف في المحليات هو المجرم الأصلي
المحليات هي بوابة الدولة هي اللي بتدي الرخصة وهي اللي بتعمل المعاينة وهي اللي بتبلغ عن المخالفة
فين كان موظف التنظيم لما الطوبة الأولى اتحطت؟
فين كان المهندس لما الدور التاني اتصب؟
فين كان رئيس الوحدة لما البيت اتسكن واتركبله عدادات رسمية من شركة الكهرباء والمياه
الإجابة ببساطة: كان بيقبض
كان بيتغاضى مقابل 5 آلاف.. 10 آلاف.. 50 ألف جنيه..
يبني البيت يعدي 5 سنين، الناس تستقر وتتجوز وتخلف وفجأة.. قرار إزالة
يبقى إحنا قدام جريمة مكتملة: تسهيل بناء مخالف + ابتزاز+ هدم على دماغ الساكن
الدولة مسؤولة عن غياب البديل
من 2011 لحد 2020، مصر كلها كانت في حالة بناء عشوائي لأن مفيش عرض سكني يكفي
الدولة نفسها تأخرت في طرح أراضي ومساكن بأسعار يتحملها المواطن البسيط
فلما تغيب الدولة الشارع بيبني بنفسه ولما تيجي الدولة بعد 10 سنين تقول اهدم بتبقى بتعالج غلط بغلط أكبر
مخاطر الهدم على الأمن القومي والمجتمعي
الهدم مش مجرد كسر طوب الهدم له 4 قنابل موقوتة
لما تهدم بيت فيه 3 أسر أنت بتطرد 15 بني آدم للشارع
الست اللي كانت بتجهز بنتها بقى عندها اكتئاب
العيال اللي كانت بتروح المدرسة من البيت ده اتشردت
الجار اللي شاف جاره بيتشرد بقى عنده كره للدولة
إحنا بنخلق أعداء من الداخل بإيدينا
2_البيت ده فيه 400 ألف جنيه مدفوعة من دم الناس فلوس شقي_ قروض_ جمعيات_ بيع دهب الست
لما تهدمه أنت بتحرق مدخرات 100 أسرة في يوم واحد
بتقتل حركة البناء بتوقف المون بتوقف الصنايعية بتوقف السوق كله
وده في وقت إحنا محتاجين فيه كل جنيه يدور في السوق
2_الشاب اللي اتهدم بيته مش هيسكت.
يا إما يروح يقف مع أي حد ضد الدولة يا إما يهاجر يا إما يفقد انتماءه
إحنا بنبني كباري وطرق بمليارات ونهد انتماء المواطن بجرار بمليون جنيه
المواطن دلوقتي بيقول: أنا هدفع تصالح ليه؟ ما كده كده هيجوا يهدوا
يبقى القانون مات والدولة خسرت مصداقيتها والفوضى كسبت
3_ اعتراضي الصريح.. الحل مش الهدم.. الحل تقنين وتصحيح
أنا مش ضد القانون أنا ضد البلطجة القانونية
القانون هدفه حماية المواطن مش تدميره.
وعشان كده بقولها بصوت عالي وفي كل مكان
لا لهدم أي منزل مأهول بالسكان اتكلف مئات الآلاف ومر عليه أكثر من سنه
مقترحات تشريعية وتنفيذية مقدمة مني لمجلسي النواب والشيوخ
تعديلات على قانون التصالح وقانون المحليات
1مشروع قانون بتعديل بعض أحكام قانون التصالح في مخالفات البناء رقم 187 لسنة 2023*
الهدف منع هدم أي مسكن مأهول بالسكان مر على إشغاله سنه أو أكثر
مادة مستحدثة رقم 9 مكرر
يحظر هدم أي مبنى مأهول بالسكان بالفعل سواء كان سكنيًا أو تجاريًا إذا مضى على إشغاله الفعلي سنه متصلة وثبت توصيل المرافق العامة له بشكل رسمي ويتم تحويل المخالفة إلى تقنين أوضاع مقابل سداد مقابل التصالح مضافًا إليه غرامة تغيير الاستخدام بنسبة لا تقل عن 10% الى 30% من تمن الأرض وسيبه قاعد على حسب المساحه والمكان والغرض من المسكن كلها دي امور تجعل النسب المئويه مختلفه
-مادة 4 مكرر
تستثنى من الهدم الحالات الآتية
المباني التي تثبت سلامتها الإنشائية بتقرير معتمد
المباني التي يسكنها مالكها الأصلي وأسرته ولا يمتلك غيرها
المباني الواقعة داخل الكتل السكنية المتصلة حتى 1/10/2024
2_مشروع قانون بإنشاء هيئة النزاهة الإدارية للمحليات
الهدف محاسبة موظفي المحليات المتورطين في تسهيل البناء المخالف
إنشاء هيئة مستقلة تتبع هيئة الرقابة الإدارية تختص بفحص ملفات البناء من 2015 إلى 2025
أي بيت اتبنى واتسكن وفيه إيصالات رشوة هاتوا الموظف اللي قب.
حبس + فصل + رد المال
عشان نوقف الماكينة دي من جذورها
مينفعش أحاسب اللي دفع الرشوة وأسيب اللي قبضها
كل موظف ثبت تقاضيه رشوة أو تغاضيه عمدًا يعاقب بالحبس من 3 إلى 7 سنوات والعزل من الوظيفة ورد المبالغ
إنشاء خط ساخن 1818 لتلقي بلاغات المواطنين عن فساد المحليات مع حماية المبلغ
3_تعديل قانون الإدارة المحلية رقم 43 لسنة 1979
الهدف ربط تقييم أداء رؤساء الوحدات المحلية بمنع المخالفات وليس بإزالتها
يكون معيار ترقية وتقييم رئيس الوحدة المحلية هو عدد المخالفات التي تم منعها قبل البناء، وليس عدد قرارات الإزالة المنفذة
مقترحات تنفيذية عاجلة للحكومة
وقف فوري للإزالات للمساكن المأهولة
إصدار قرار رئيس مجلس الوزراء بوقف تنفيذ أي قرار إزالة لمسكن مأهول حتى يتم فحصه في لجنة ثلاثية: محافظة – إسكان – رقابة إدارية
تشكيل لجنة في كل محافظة اسمها لجنة التهدئة المجتمعية
للبت في الحالات الإنسانية خلال 30 يومًا
فصل المالك عن السمسار
اللي بنى لنفسه وساكن يتقن وضعه
اللي بنى عشان يبيع ويكسب يتحاسب جنائيًا ويتهد الدور المخالف
مينفعش نعامل الست الأرملة زي المقاول النصاب
2 إنشاء صندوق تقنين وتعمير
تودع فيه 100% من حصيلة التصالح وغرامات التقنين
يخصص 70% منه لبناء وحدات إسكان بديل للشباب في نفس المركز و30% لتطوير البنية التحتية للمناطق التي تم تقنينها
3 فتح باب التقنين الإلكتروني لمدة 6 أشهر
منصة موحدة على مصر الرقمية لتقديم طلبات التقنين بدون احتكاك بالموظف
تسعيرة واضحة ومعلنة حسب الموقع والمساحة لا تقبل الاجتهاد
4فصل الساكن عن التاجر
إصدار تعليمات واضحة من يثبت أنه بنى وسكن يتقن وضعه
من يثبت أنه بنى للبيع والتربح يهدم الدور المخالف فقط ويحاسب جنائيًا
5_مقترحات لحماية المواطن البسيط
إنشاء مكتب الدفاع عن المتضررين من الإزالات
تابع لوزارة العدل يقدم دعمًا قانونيًا مجانيًا لكل أسرة صدر لها قرار إزالة
يتولى الطعن على القرارات أمام المحاكم الإدارية
حظر قطع المرافق عن المساكن المأهولة
لا يجوز قطع الكهرباء أو المياه عن منزل مأهول حتى لو كان مخالفًا إلا بحكم قضائي نهائي
-العقوبة: حبس وغرامة للموظف الذي يقطع المرافق بالمخالفة
إلزام المحليات بإنذار كتابي قبل الإزالة بـ 60 يومًا
مع إلزامها بعرض 3 بدائل على الأسرة: تقنين نقل تعويض
لا إزالة على الفجر أو بدون حضور النيابة العامة
6_ المبررات والأثر المتوقع
البند الأثر المتوقع
منع هدم المساكن المأهولة حماية 2 مليون أسرة من التشرد حفظ السلم الاجتماعي
تقنين مقابل غرامات تحصيل 80-120 مليار جنيه للدولة في 3 سنوات
محاسبة موظفي المحليات قطع رأس الفساد استعادة ثقة المواطن
وقف الإزالات مؤقتًاتهدئة الشارع.إعطاء فرصة للمراجعة القانونية
صندوق التعمير تحويل فلوس التصالح إلى إسكان حقي للشباب
المطلوب من مجلس النواب والشيوخ
1إحالة المقترحات إلى لجنة الإسكان والإدارة المحلية للمناقشة العاجلة خلال 15 يومًا
2عقد جلسة استماع بحضور وزير التنمية المحلية_ وزير الإسكان_ ورؤساء جمعيات المتضررين_
3إصدار توصية عاجلة للحكومةبوقف الإزالات للمساكن المأهولة لحين إقرار التعديلات
أين كانت المحليات؟
ده السؤال اللي لازم يتحط على مكتب رئيس الوزراء كل يوم
أين كان رؤساء الوحدات المحلية
أين كانت لجان المتابعة؟
أين كان قسم الإشغالات؟
أين كان مجلس المدينة؟
الإجابة مرة: كانوا شركاء في الجريمه
إما بالصمت_ أو بالقبض_أو بـ سيب وأنا أسيب
فمينفعش النهاردة أجيب نفس الموظف اللي قبض وأقوله روح اهدم
المحليات محتاجة غسيل كامل
تدوير للقيادات كل 2 سنة
ربط راتب المهندس بـ عدد المخالفات اللي منعها مش بـ عدد المخالفات اللي عملها
نيابة إدارية متخصصة في جرائم البناء داخل كل محافظة
كلمة أخيرة للدولة والمواطن
للدولة
القوة مش في الجرافة القوة في العدل
لو المواطن حس إنك عادل هيهد بيته بإيده لو غلط
لكن لو حس إنك ظالم هيحاربك حتى لو على حق
للمواطن
متبنيش مخالف تاني استنى واشتكي واضغط على نائبكواطلب أرض رسمية
لأن البيت اللي هتبنيه النهارده مخالف هيكون سبب قهرة عيالك بكره البيت مش 4 حيطان البيت أمان
والأمان ده لو اتهدم البلد كلها بتتهد معاه
أنا بقولها صريحة:
أنا ضد أي إزالة لبيت مأهول بالسكان
ومع أي تصالح ومع أي غرامة ومع أي سجن لموظف فاسد في المحليات
صححوا الوضع.. رجعوا الفلوس اللي اتنهبت.. حاسبوا اللي قبض.. وقنوا للناس الغلابة
#الدولةالقويةلاتبنى_على_أنقاض_بيوت_أهلها
#العدليقول_حاسب_الفاسدوقن_للغلابان_وابني_للشاب
#لاتبني_الجمهوريةالجديدةعلى_أنقاض_بيوت_الغلابة
#صوت_العقل_إرادة_الغد
#النائب_عبده_احمدحسانين